Sunday, October 14, 2012

အမာရွတ်

ကောင်လေးတစ်ယောက်ဟာ သူတက်ရောက်ပညာသင်ကြားနေတဲ့ မူလတန်းကျောင်းရဲ့
ပထမအကြိမ် မိဘဆရာအသင်း အစည်းအဝေးပွဲကိုတက်ရောက်ဖို့ မိခင်ဖြစ်သူကို
ဖိတ်ကြားခဲ့ပါတယ်။ တက်ဖြစ်အောင်တက်မယ်လို့ မိခင်က ပြောလိုက်တဲ့အခါ
ကောင်ကလေး တုန်လှုပ်သွားပါတယ်။ အဲဒီပွဲမှာ သူငယ်ချင်းတွေနဲ့ ဆရာတွေဟာ
သူ့မိခင်ကို တွေ့မြင်ကြပြီး သူ့မိခင်ရဲ့ ပုံပန်းသွင်ပြင်ကြောင့် သူအရှက်
ရနိုင်ပါတယ်။ သူ့အမေဟာ လှပတဲ့ အမျိုးသမီးတစ်ဦးဖြစ်ပေမယ့်
ညာဘက်ပါးပြင်မှာတော့ ကြီးမားတဲ့ အမာရွတ်တစ်ခု ရှိနေခဲ့ပါတယ်။ လူငယ်လေးဟာ
သူ့အမေ အမာရွတ် ဘာကြောင့် ရခဲ့သလဲဆိုတာ မမေးချင်သလို
ပြောလည်းမပြောချင်ပါဘူး။
သူ့အမေမှာ အမာရွတ် ရှိနေခဲ့ပေမယ့် အစည်းအဝေးပွဲမှာတော့ လူတိုင်းဟာ သူမရဲ့
သဘာဝအလှနဲ့ ကြင်နာမှုတွေကြောင့် လေးစားအထင်ကြီးခဲ့ကြပါတယ်။ ဒါပေမယ့်
ကောင်လေးကတော့ ရှက်ရွံ့အားငယ်နေပြီး လူတိုင်းနဲ့ ပုန်းကွယ်နေခဲ့ပါတယ်။
သူ့အမေနဲ့ ဆရာဖြစ်သူတို့ စကားပြောနေတာကို ကြားနိုင်တဲ့နေရာ
သူရောက်လာမိပြီးနောက် သူတို့ပြောနေသမျှ ကြားခဲ့ရပါတယ်။
"ခင်ဗျားမျက်နှာမှာ ဘယ်လိုဖြစ်ပြီး အမာရွတ် ထင်ခဲ့ရတာလဲ" လို့ ဆရာဖြစ်သူက
မေးမြန်းစုံစမ်းပါတယ်။
သူ့အမေက ပြန်ပြောပြပါတယ်။
" ကျွန်မသား ကလေးဘဝတုန်းက မီးလောင်နေတဲ့အခန်းထဲမှာ ပိတ်မိနေခဲ့တယ်။ မီးဟာ
ထိန်းချုပ်လို့မရလောက်အောင် လောင်ကျွမ်းနေတဲ့အတွက် အခန်းထဲ ဘယ်သူမှ
မဝင်ရဲခဲ့ပါဘူး။ ကျွန်မသားရဲ့ပုခက်ဆီ ပြေးနေတဲ့အချိန်မှာမီးစတစ်ခု
ပြုတ်ကျလာတာကိုတွေ့တော့ သားကိုကာကွယ်ဖို့ ကျွန်မကိုယ်ကို သူ့အပေါ်
မိုးပေးခဲ့ရတယ်။ မီးစထိမှန်တဲ့အခါ ကျွန်မ သတိလစ်မေ့သွားခဲ့ရတယ်။
ကံကောင်းချင်တော့ မီးသတ်သမားတစ်ဦး ရောက်လာပြီး ကျွန်မတို့နှစ်ဦးကို
ကယ်ခဲ့ပါတယ်" သူ့အမေဟာ မီးလောင်ဒဏ်ရာကြောင့် အမာရွတ်ထင်နေတဲ့ ပါးပြင်ကို
ကိုင်လိုက်ပါတယ်။ "ဒီအမာရွတ်ကတော့ အမြဲတမ်း ရှိနေမှာပါ။ ဒါပေမယ့်
ဒီနေ့အထိ ကျွန်မလုပ်ခဲ့မိတာနဲ့ပတ်သက်ပြီး ဘယ်တုန်းကမှ
နောင်တမရမိခဲ့ပါဘူးရှင်"
ဒီစကားကို ကြားရတဲ့အခါ ကောင်ကလေးဟာ ပုန်းကွယ်ရာကနေ ထွက်လာပြီး သူ့အမေဆီ
မျက်ရည်စက်လက်နဲ့ ပြေးသွားခဲ့ပါတယ်။ သူ့အမေ သူ့အပေါ် အနစ်နာ
ခံခဲ့တာကိုတွေးရင်း စိတ်မကောင်းဖြစ်ကာ
မိခင်ဖြစ်သူကိုသိုင်းဖက်လိုက်ပါတယ်။ အဲဒီနေ့တစ်နေ့လုံး သူဟာ
သူ့အမေရဲ့လက်ကို တင်းတင်းကြပ်ကြပ်ဆုပ်ကိုင်းရင်း
ဂုဏ်ယူဝင့်ကြွားနေခဲ့မိတော့တယ်။
Ref; The Scar by Lih Yuh Kuo
နေလင်းအောင် ဘာသာပြန်ဆိုသည်။

No comments:

ပြောချင်ရာများ ပြောခဲ့ဖို့...

မေးလ်ထဲမှဖတ်ရူ့လိုပါက အီးမေးလ်လိပ်စာ ထားသွားပါ